VIVA SE BLOGS

Dankie

Geplaas deur Sophia Kapp Donderdag, 09 Desember 2021
Gepubliseer in VivA;

En skielik, sommer so eensklaps, is dit Desember. Nee wag, ek is anderdag laat weet dis nie net Desember nie, dis Dezemba, want in Suid-Afrika is dit nie sommer maar net 'n maand nie, dis 'n gemoedstemming. 'n Ingesteldheid. Dis 'n tyd vir vrolikheid en feesviering, dis 'n tyd om die griewe en beswaardhede van die jaar af te lê en om moed te skep vir wat ook al vorentoe wag.

Boweal is dit tyd om dankie te sê ná ʼn moeilike jaar. (Eintlik was die vir die meeste mense ʼn moeilike twee jaar, maar dit maak die rede vir die dankie meer, nie minder nie.) So vreemd as wat dit is, is ons by VivA dankbaar vir oorlewing. Hoewel ons dit nie elke dag hardop sê nie, weet ons Afrikaans is onder druk. Elke Afrikaanse gesin wat emigreer, elke Afrikaanse ouer wat ʼn kind in ʼn Engelse skool inskryf, elke Afrikaanse jongmens wat in ʼn professionele omgewing verengels, elke toespraak deur ʼn opportunistiese politikus, bring ʼn beklemming oor die toekoms mee. In ʼn land wat steier onder korrupsie en covid, is daar nie geld vir "luukshede" soos taalprojekte nie. In ʼn tyd waar kontak tussen mense al hoe moeiliker word, is virtuele werkers daadwerklik slagoffers van oorwerk en uitbranding.

Dis veral, en miskien juis, teen hierdie agtergrond dat ons by VivA rede het om dankbaar te wees. Ons kon, ten spyte van taai omstandighede, nie net voortbestaan nie, ons kon gedy. Ons kon ons grammatikaprojek voortsit en die afdeling oor die sintaksis begin beskryf. Baie dankie aan kollegas Adri Breed, Nadine Fouché-Karstens, Cecilia Erasmus, Suléne Pilon en Roné Wierenga van Wyk vir hulle toegewyde werk aan hierdie belangrike taak. Ons kon met die hulp en samewerking van die Blinde gemeenskap ons koppelvlakke bywerk en aanpas en oor ontwerp sodat dit vir siggestremdes makliker kan word om toegang tot ons produkte en dienste te kry. Kollega Gustaf Tempelhoff was daar die dryfveer. Ons kon Teksredaksieportaal aan die gang kry, ʼn ruimte waar taalpraktisyns en voornemende taalpraktisyns opleiding kry, en ons kon ons bestaande taaladviesdiens versterk met die toetrede van Stefan van Zyl, ʼn ervare en geakkrediteerde teksredakteur, sodat ons gebruikers steeds topgehalteraad kry, al gaan sekere mense met verlof. Oor al hierdie projekte het ons uitvoerende direkteur, Marlie Coetzee, met haar arendsoog gewaak terwyl sy nie net die beursie moes bestuur nie, maar ook haar ma, Marinda, deur ʼn kwaai stryd met kanker moes dra. Ons is aan die einde van hierdie jaar baie dankbaar, ook op ʼn persoonlike vlak, dat Marinda pas haar goue sertifikaat as kankeroorwinnaar gekry het.

As ek dus sê ons is dankbaar, bedoel ek dit met die bewustheid dat ons harder as gewoonlik moes werk om die jaar op ʼn positiewe noot te eindig. Ons is dankbaar dat ons in moeilike omstandighede en dikwels vyandige omgewing steeds vir Afrikaans kan werk. Ons is dankbaar dat ons as ʼn gideonsbende berge kan versit, en ons is dankbaar vir ons direksie en ons befondsers wat hulle sente moet omdraai, maar steeds genoeg in ons glo om ons te ondersteun waar hulle kan.

Maar as daar dan vir ons onverdunde lig is, is dit ons gebruikers hier by VivA. In ʼn jaar waarin ons ʼn donkerblou vergiftiging van sosiale media beleef het, waar mense mekaar in die openbaar en openlik verdelg het, kon ons mekaar oor kommas en koppeltekens, oor nuutskeppings en taalkleinode vind. Ons is dus boweal dankbaar vir elke gebruiker wat VivA in hierdie jaar ondersteun het, vir elkeen wat ons app afgelaai het, vir elkeen wat ʼn navraag gestuur het of ʼn kommentaartjie op Facebook geplaas het of ʼn dankie gewhatsapp het. Alles wat ons skep, alles wat ons beplan, alles wat ons doen, is vir en in diens van die taalgemeenskap. Sonder ons leerders, ons onderwysers, ons sprekers en ons skrywers, het VivA geen bestaansreg nie, en sonder sy mense het Afrikaans geen toekoms nie.

Dankie dus, uit ons harte, vir hierdie jaar. Mag sy einde vir elkeen van julle sag wees, en mag ons mekaar weer in 2022 ontmoet met nuwe ywer en nuwe drome, met die vaste oortuiging dat ons en ons taal ʼn taak en ʼn plek het, en dat ons steeds onder ʼn verpligting is om na die beste van ons vermoë sy kinders op te lei en sy stories te vertel.

Beste wense vir ʼn baie geseënde Kerstyd en ʼn voorspoedige 2022 vir elkeen!

VivA-groete

Sophia   

Lees 667 tye Laaste modifikasie op Donderdag, 09 Desember 2021 09:00