Afrikaans druk digitale stempel nou deeglik af

Geplaas deur Gerhard van Huyssteen Saterdag 05 Augustus 2017
Gepubliseer in VivA;

As jy teen dié tyd nog nie gehoor het van die gloednuwe Afrikaanse woordelys en spel­reëls (AWS) nie, was jy waarskynlik met vakansie in die boendoe.

Donderdagaand 3 Augustus 2017 is dié eeufeesuitgawe by ’n luisterryke geleentheid op die dak van die Media24-gebou in Kaapstad bekend gestel. RSG het die bekendstelling regstreeks uitgesaai, Coenie de Villiers het ’n opreggeteelde hond uit ’n bos uit gesing, die kameras het gerol en geflits, daar is feestelik gefuif en gebras. Die uitgewer, Pharos Woordeboeke, het geen geld en moeite ontsien nie om dié Afrikaanse prestasie met luide geskal te vier.

Presies 100 jaar gelede het die eerste uitgawe van die AWS verskyn. Die klein, beskeie, bruin boekie van net oor die 200 bladsye had maar 48 spelreëls en ongeveer 16 000 inskrywings in die woordelysdeel. Geskrewe Afrikaans was in sy puberskoene.

Vanjaar se AWS is ’n lywige, parmantige, karmynrooi standaardwerk van bykans 800 bladsye, met 457 reëls en meer as 34 000 woordelysinskrywings. Geskrewe Afrikaans het ringkopstatus bereik.

’n Taal wat in die 21ste eeu nie sy digitale stempel kan afdruk nie, gaan myns insiens sukkel om die 22ste eeu lewend te haal. Daarom is dit belangwekkend dat dié AWS ook Afrikaans se vele ontwikkelinge in die digitale era etaleer.

  • ’n Groot deel van die meer as 2 000 woorde wat toegevoeg is tot die woordelysdeel, bestaan uit woorde wat Afrikaanssprekendes se omgang in die tegnologiewêreld weer­spieël: Wi-Fi of wi-fi; whatsapp (as soortnaam én werkwoord); warsender; swiep (wat jy met jou vinger doen op jou slimfoon); skermgreep of skermskoot; googleloer (google as werkwoord staan lankal in die AWS); rekenaarkluster; klusterberekening; meem; hutsmerk of hutsmerker; videoblog of vlog (blog was al in die vorige AWS); hommeltuig; antispioenware; en spelifiseer, om maar ’n paar te noem.
  • Die AWS is – met bloed, sweet en trane – volledig omgeskakel na XML-formaat. Dit verseker dat toekomstige Taalkommissies makliker en doeltreffender dié erfstuk kan bywerk en versprei.
  • Die AWS is volledig aanlyn beskikbaar by www.pharos­aanlyn.co.za. Dit is makliker as ooit om deur die AWS te soek, om op hiperskakels te klik wat jou na die relevante reëls neem, om die AWS saam te neem waar jy ook al gaan.
  • Ook die werkwyse van die Taalkommissie staan in die teken van die digitale tyd. Ons gebruik groot versamelings aanlyn- elektroniese tekste om woorde en reëls na te vors, ons neem besluite op digitale platforms en ons konsulteer en kommunikeer met taalgebruikers via Facebook.

Afrikaans se digitale prestasies strek nóg verder: Die woordelysdeel gaan ook van Oktober gratis in VivA se slimfoontoepassing beskikbaar wees. Allerhande taaltegnologieë word met dié toepassing geïllustreer, soos outomatiese voltooiing van woorde, slim voorstelle as jy nie weet hoe om ’n woord te spel nie, integrasie met Wikipedia en ­Wiktionary, ensovoorts.

En die mooiste bewys van Afrikaans se digitale voetspoor is dat jy met jou stem soektogte in die AWS kan doen (ten minste in die Androidtoepassing).

Maar daar is nie tyd om op ons louere te rus nie . . . Op die afgelope week se Taalkommissie-sitting is reeds begin beplan aan ’n volgende uitgawe!

Hierdie rubriek het in gewysigde vorm in Beeld van 05 Augustus 2017 verskyn.

Lees 697 tye Laaste modifikasie op Sondag 13 Augustus 2017 16:33

1 kommentaar

  • Kommentaarskakel Em Steyn Maandag 07 Augustus 2017 18:20 geplaas deur Em Steyn

    Baie geluk aan die Taalkommissie en al die medewerkers met die nuwe AWS. Dit is voorwaar ’n pragpublikasie!

    Baie dankie vir julle baie harde werk om dit alles te doen. My kop draai sommer as ek dink aan al die konsentrasie wat dit geverg het om die taalreëls te hersien en te herformuleer. En dan nog die voorbeeldsinne ook. Party laat my glimlag, soos die een op bl. 128: “... wag jy vir die elwe om dit [die werk] in die nag te kom klaarmaak?” Partykeer wens ek hulle wil.

    Ek is net oor een dingetjie hartseer en dit is daardie ou afstandskoppeltekentjie. Ek kon mos nooit vat aan die ventjie kry nie en het hom vermy waar ek kon. Nou sal ek hom seker maar moet innooi.

    Nietemin, ek bly ’n geesdriftige en dankbare gebruiker van die AWS.

    Weereens/Weer eens baie geluk en baie dankie!

RSS-VOERE

Is jy 'n groentjie as dit oor RSS-voere gaan? Laai ons blitsgids af om jou te help.

NUUSARGIEF

FACEBOOK