Wat is dit nou weer met RSG se 'huidiglik'?

Geplaas deur Gerhard van Huyssteen Saterdag 04 November 2017
Gepubliseer in VivA;

So ʼn paar maande gelede, tydens ʼn Skypegesprek met ʼn geëmigreerde veeartsvriend van my, vra hy: “Is ‘huidiglik’ nou al ʼn Afrikaanse woord? Ek hoor deesdae op RSG dat al wat ʼn omroeper, gas en inbeller ‘huidiglik’ gebruik. Toe dog ek maar die Taalkommissie het die groen lig gegee om dit te gebruik?”

Ek sug diep en verduidelik weer: “Die Taalkommissie het niks oor taalgebruik oor die eter te sê nie: Ons hou ons slegs besig met geskrewe Standaardafrikaans. Boonop het ons geen beheer oor mense se taalgebruik nie: Ons beskryf maar eintlik net wat – huidiglik! – in die standaardvariëteit gebeur.”

Maar sy opmerking sit my aan die dink …

Hoe fassinerend is dit dat iemand wat duisende kilometers ver in die buiteland sit, méér na RSG luister as ek! Dis tog fantasties hoe tegnologie ons wêrelde vergroot, meer keuses aan ons bied. Selwers luister ek die afgelope jaar eintlik uitsluitlik na podsendings (soos onder andere RSG se Die tale wat ons praat, of Willim Welsyn se onderhoude met interessante/vreemde/bekende mense). As ek Afrikaanse popmusiek wil luister, skakel ek via die internet in op Bok Radio (wat doer ver in die Kaap in is). Vir nuus, weer en verkeer luister ek soggens via my DStv-dekodeerder na Groot FM (net hier om die draai van my in Pretoria). Einste DStv is nog die enigste speek in my betaal-waarna-jy-kyk-wiel, want wanneer gaan ons ook regstreekse sport op aanvraag kry? Ek wil graag betaal om rugby, tennis en atletiek te kyk, maar nie vir die magdom sokkerkanale nie.

Die “huidiglik”-kwessie laat my ook dink oor die rol wat gesproke media in die ontwikkeling van Afrikaans speel. Toe ek ʼn kind was, was die Afrikaanse radiodiens se woord en uitspraak wet: As mense soos Alewyn Lee, Riaan Cruywagen of Mariëtta Kruger iets op ʼn bepaalde manier gesê het, dan was dit sonder twyfel aanvaarde Afrikaans. Hulle was die taalmakers.

En vandag? Vir die interessantheid stroom ek Bok Radio terwyl ek hierdie rubriek skryf. In die bestek van sewe minute hoor ek onder andere:

  • Gaan registreer nou vir ons bootreis, anders gaan jy uitmis.
  • Terme en kondisies
  • Hierdie nuus was aan jou gebring deur …

Ten einde kwessies soos hierdie ʼn bietjie deur te trap, bied VivA in samewerking met RSG ʼn openbare simposium aan met die tema “Afrikaans oor die nuwe eter: taalverandering en tegnologiegeleenthede”.

Die eerste paneelbespreking sal fokus op die rol wat die gesproke media speel in taalverandering. Die paneellede is Magdaleen Kruger (RSG), Rian Cloete (NBC), Daniëlla van Heerden (eNuus), Suléne Pilon (UP/Taalkommissie) en Dawid van Lill (radio- en TV-doyen).

In die tweede paneelbespreking praat ons oor al die tegnologiegeleenthede wat vir die Afrikaanse mark bestaan (en wat dalk nog nie ontgin is nie?). In hierdie rondte praat Bouwer Bosch (bekende vlogger), Gareth Cliff (CliffCentral), Francois Retief (iono.fm), Johrné van Huyssteen (Die GROOT Ontbyt) en Willim Welsyn (bekende podsender) met mekaar.

Die simposium vind van 11:00 tot 14:00 op 14 November by Radiopark in Johannesburg plaas. Daar is slegs plek vir 65 gehoorlede. Om te registreer, gaan na viva-afrikaans.org/simposium; toegang is gratis.

Hierdie rubriek het in gewysigde vorm in Beeld van 04 November 2017 verskyn.

Beeld logo

Lees 1090 tye

RSS-VOERE

Is jy 'n groentjie as dit oor RSS-voere gaan? Laai ons blitsgids af om jou te help.

NUUSARGIEF

FACEBOOK