Bekendstelling: Eenders & Anders

Geplaas deur VivA-redaksie Sondag 11 Februarie 2018
Gepubliseer in VivA;

Ná die sowat dertig jaar wat Nederlands in Suid-Afrikaanse skole afwesig was, het die Suid-Afrikaanse Sentrum vir Nederland en Vlaandere (SASNEV), in samewerking met Protea Boekhuis, pas ’n Afrikaans-Nederlandse lespakket vir skole bekend gestel.

EendersAnders

Eenders & Anders

Dié pakket – ’n reeks vir graad 6 tot graad 11 – het ten doel om leerders wat Afrikaans as huistaal neem aan die Nederlandse en Vlaamse taal, kultuur en letterkunde bekend te stel. Enersyds word op ooreenkomste gelet – dinge wat in Suid-Afrika, Nederland en België dieselfde is. Andersyds word ondersoek hoe dié lande en tale van mekaar verskil. Van Suid-Afrikaanse lekkernye, soos melktert en koesisters, tot die Nederlandse stroopwafel en sy ouboet die Belgiese wafel kom onder die loep; legendariese karakters, ridders en rolmodelle; fietsry en kampeer; en ander interessante dinge. Van die taalaspekte wat gedek word, is onder meer spelling, leenwoorde en woordeskatontwikkeling.

Die lesse wat deel uitmaak van die pakket, voldoen aan al die vereistes van die Kurrikulum- en Assesseringsbeleidsverklaring (KABV) vir Afrikaans Huistaal, graad 6–11. Die aktiwiteite kan met gemak as ’n volledige tweeweeksiklus tydens die skooljaar aangebied word. Vir elke graad is daar ’n boekie vir die leerders en vir die onderwyser ’n gids. Die inhoud is so saamgestel dat een van die hoofstukke in die leerders se gewone taalhandboek met gemak daardeur vervang kan word. Vir graad 6, 7, 8 en 9 sluit die inhoud ten nouste aan by die KABV se vereistes vir week 5 en 6 van die tweede kwartaal. Al die temas wat die kurrikulum vir dié twee weke vereis, word gedek, en ook van die res van die jaar se werk word betrek. Die inhoud van die lespakket vir graad 10 en 11 dek die kurrikulumvereistes vir week 33 en 34, kwartaal 4, en sluit ook aan by werk wat die leerders direk vóór en ná dié twee weke doen.

Kwartet1ʼn Interessante bonus is die spesiale kwartetspel wat as deel van die pakket ontwikkel is. ʼn Meegaande stel volkleurkaarte in ʼn boksie is by die onderwysersgids ingesluit. In die spel wat met dié kaarte gespeel word, moet elke speler soveel moontlik kwartette versamel, dit is vier kaarte wat tot diesefde tema behoort. Die kaarte in die pak is tussen nege kategorieë verdeel.

Afrikaans is die moedertaal van 7 miljoen Suid-Afrikaners. Nederlands is die taal van ongeveer 17 miljoen Nederlanders in Nederland en sowat 6 miljoen Vlaminge in België. Dus is ons altesaam byna 30 miljoen mense wat almal mekaar so min of meer verstaan. Die Vlaminge praat hulle Nederlands – Vlaams – met ’n uitspraak wat soms baie soos Afrikaans klink, maar anders as Afrikaans, word Vlaams slegs gepráát – skryf en lees doen Vlaminge in Nederlands.

Hetsy volledig as verryking vir topklasse aangebied, hetsy as aanvullende materiaal: Eenders & Anders bied onderwysers (en ouers) die geleentheid om Afrikaanse kinders op ’n prettige manier aan hulle taalfamilie in Nederland en België bekend te stel. Saam, oor kontinente heen, is ons sprekers van dieselfde moedertaalgemeenskap: eenders, maar anders – anders, maar eenders.

Besoek die drietalige webwerf (Afrikaans, Nederlands en Engels) vir besonderhede, of bestel by Protea Boekhuis

 

Lees 1234 tye Laaste modifikasie op Sondag 11 Februarie 2018 19:22

1 kommentaar

RSS-VOERE

Is jy 'n groentjie as dit oor RSS-voere gaan? Laai ons blitsgids af om jou te help.

NUUSARGIEF

FACEBOOK