Namibiërs is deel van Afrikaanse gemeenskap

Geplaas deur Gerhard van Huyssteen Saterdag 03 Maart 2018
Gepubliseer in VivA;

Die afgelope week het die Taalkommissie (TK) van die Suid-Afrikaanse Akademie vir Wetenskap en Kuns (SAAWK) vir die tweede keer in sy bestaan in Windhoek, Namibië vergader. Die eerste keer was in Maart 2013.

Waarom wéér in Namibië vergader? Namibië het die tweede grootste populasie moedertaalsprekers van Afrikaans in die wêreld (naastenby 200 000). (Australië is die land met die derde grootste populasie met so ongeveer 35 000 Afrikaansmoedertaalsprekers.) Daarom dien daar ook Namibiërs by wyle in die Taalkommissie, byvoorbeeld Herman Beyer (tot en met 2017) en Leona Compion (vanaf 2018; flussies meer oor haar). Soos die vorige keer, het ons die afgelope week ook die nuwe Afrikaanse woordelys en spelreëls (AWS) in die Namibiese media en by ʼn onderwyserskongres bekend gestel.

Hier volg ʼn paar nuusbrokkies oor die afgelope sitting:

 

  • Vir die eerste keer in die geskiedenis dien daar meer vroue as mans in die TK. Oók vir die eerste keer is daar meer vroue as mans in die dagbestuur: Suléne Pilon (Universiteit van Pretoria) is verkies as ondervoorsitter (ook die eerste keer wat ʼn vrou dié amp beklee) en Jana Luther (Virtuele Instituut vir Afrikaans) as sekretaris. (Die uwe is herkies as voorsitter.)
  • Twee nuwe lede het vir die eerste keer ʼn TK-sitting bygewoon. Leona Compion is ʼn Namibiër in murg en been en staan al vir meer as veertig jaar haar plek vol in die onderwyswêreld: as onderwyser, opleier van Afrikaansonderwysers en kurrikulumontwikkelaar (vir byna twintig jaar). Gerda Engelbrecht is ’n besturende redakteur by Media24 in Kaapstad, maar gee ook deeltyds klas in Afrikaanse redigering by die Universiteit Stellenbosch se Departement Joernalistiek. Sy is ’n leesverslaafde met ’n PhD in letterkunde, asook ’n blokraaibetottelde wat blokraaie vir tien tydskrifte in die Media24-stal opstel.

Windhoek deur Jana Luther

  • Die SAAWK het meer as 250 kopieë van die 2017-AWS aan Afrikaansonderwysers geskenk. Met hierdie gebaar word nie net vir Namibiërs gewys dat hulle ook as ʼn kerndeel van die Afrikaanse gemeenskap geag word nie, maar ook om Afrikaansonderwysers te bemagtig om op hoogte van die nuutste verwikkelinge in Afrikaans te bly.
  • Daar is met groot erns en toewyding begin werk aan ʼn volgende uitgawe van die AWS. Soos dit nou maar die gebruik is in Afrikaanse organisasies, is daar kleiner komitees uit die subkommissies van die hoofkommissie benoem om reeds by die volgende sitting met konkrete voorstelle vir ʼn vernieude AWS te kom.
  • Van die lekkerste werk van die TK is om ure en ure en ure te spandeer aan gesprekke en navorsing oor nuwe en ou woorde in Afrikaans. So byvoorbeeld het die woord “gebenedyde” byna-byna gesneuwel, maar is tog ter elfder ure tydens teetyd gered deur ʼn gekoukus en -stemwerwery deur Frikkie Lombard.
  • Gelukkig is ook bykans honderd nuwe woorde voorlopig opgeneem, waarvan “gefotobom” die meeste gesprek ontlok het.
  • Ek het vir die eerste keer in my lewe geleer dat “alteveel” en “altevol” sinonieme is wat “baie” beteken. Jy kan byvoorbeeld sê: “Hy was altevol/alteveel lief vir sy hond.” Dit moet natuurlik nie verwar word nie met “alte vol” (Hy is alte vol van homself) en “al te vol” (Die emmer is al te vol om te dra). #sug

Luister ook na die podsending wat oor hierdie rubriek handel.

Hierdie rubriek het in gewysigde vorm in Beeld van 03 Maart 2018  verskyn.

Beeld logo

Lees 685 tye Laaste modifikasie op Saterdag 03 Maart 2018 17:25

RSS-VOERE

Is jy 'n groentjie as dit oor RSS-voere gaan? Laai ons blitsgids af om jou te help.

NUUSARGIEF

FACEBOOK