Tematiese leerderwoordeboek vir Afrikaans

Geplaas deur Jana Luther Maandag 15 Julie 2019
Gepubliseer in VivA;

Is jy ’n Afrikaansonderwyser? Leer jy Afrikaans (of Engels as addisionele taal), of ken jy iemand wat Afrikaans (wil) (aan)leer? Deel dan dié plasing en laat hulle weet van die tematiese (aan)leerderwoordeboek wat by die Virtuele Instituut vir Afrikaans ontwikkel word.

Vir inkyk, deurblaai en raadpleeg. Hier. Maar lees eers die inleiding ...

Welkom by die VivA Leerderwoordeboek vir Afrikaans Huistaal en Addisionele Taal.

As ’n onderafdeling van ’n nuwe Taalonderrigportaal wat by VivA in aanbou is, word dié nuwe woordeboek vir beide moedertaalsprekers en aanleerders geskep. Dit is oorwegend ’n tematiese woordeboek wat (aan)leerders as ’n brug tot VivA se omvattende Woordeboekportaal kan gebruik. Die Leerderwoordeboek word weekliks aangevul met nuwe temas.

In die linkerkantste kolom op jou rekenaar sien jy ’n alfabetiese lys van al die trefwoorde wat reeds in die Leerderwoordeboek opgeneem is. Klik op die letter van die alfabet en dan op die trefwoord van jou keuse om die artikel te sien.

 

LWDB gebruik 01

 

Let veral op die soekkassie in die regterkantste hoek boaan die skerm. Hier kan jy enige woord tik en dié woord vind oral waar dit in die Leerderwoordeboek voorkom, nie net as trefwoord nie, maar ook in al die lyste waar woorde volgens verskillende temas saamgevoeg word, in definisies, frases, en so meer. Soek tussen aanhalingstekens om die presiese woord of frase te kry.

 

LWDB gebruik 02

 

As jou soekwoord nog nie in die Leerderwoordeboek opgeneem is nie, klik op die Woordeboekportaalskakel wat verskyn.

 

LWDB gebruik 03

 

As jy op die Woordeboekportaalskakel klik, sien jy die trefslae van jou soekwoord in al die woordeboeke in VivA se Woordeboekportaal.

 

LWDB gebruik 04

 

Met die tematiese Leerderwoordeboek wil VivA vir Afrikaansleerders en -onderwysers, vir die vakke Afrikaans Huistaal, Afrikaans Eerste Addisionele Taal en Afrikaans Tweede Addisionele Taal, ’n hulpmiddel skep om woordeskat te ontwikkel en lees- en luisterbegrip te oefen. Ons begin deur woorde en frases wat met spesifieke temas verband hou, saam op een webblad te versamel; een tema, een artikel. Gebruikers wat oor ’n spesifieke onderwerp wil praat of skryf, hoef hier dus nie dadelik deur verskillende woordeboeke te blaai nie. As die tema reeds in die Leerderwoordeboek ingesluit is, kan jy vinnig, met ’n klik van die muis en ’n enkele oogopslag, verskillende woorde en frases sien wat met die onderwerp verband hou. 

As die tema nog nie in die Leerderwoordeboek ingesluit is nie, kan jy direk in die Woordeboekportaal soek. 

Gaan ook na die Woordeboekportaal vir aanvullende inligting by die woorde wat jy in die Leerderwoordeboek vind.

Let op dat die Leerderwoordeboek NIE ’n volledige woordeboek is nie. In metaleksikografiese terme is dit ’n aanbouwoordeboek wat deurlopend uitgebrei word. Die benadering hier is: Maak beskikbaar wat jy het. “Building the plane as it flies.”

Vir die volledigs moontlike prentjie: Raadpleeg dié hulpbron altyd saam met die ander naslaanbronne in VivA se Woordeboekportaal. 

 

LWDB gebruik 05

Onthou dat jy met ’n CTRL+F-soektog enige woord op ’n blad nog vinniger kry!

 

 

Van die woorde op die temabladsye word ook as aparte trefwoorde in die Leerderwoordeboek opgeneem. In die afsonderlike artikels word dié woorde verder behandel. Hier is meestal ’n kruisverwysing waarop jy kan klik om jou na die temabladsy terug te neem.

 

LWDB gebruik 07

LWDB gebruik 08

 

Die VivA Leerderwoordeboek is nie volledig eentalig (Afrikaans) nie, ook nie volledig tweetalig (Afrikaans-Engels-Engels-Afrikaans) nie, maar kan as brug tussen die twee tale gebruik word. Engelse vertaalekwivalente word ruimskoots bygevoeg, plek-plek ook vertalings uit van Suid-Afrika se ander amptelike tale, asook woorde uit Nederlands. Dan spesifiek uit die Algemeen Nederlands Woordenboek (ANW) wat VivA met die vriendelike vergunning van die Instituut voor de Nederlandse Taal vir hierdie projek mag ontgin. 

Deur woorde uit die verskillende tale met mekaar in verband te bring, wil ons graag meertaligheid bevorder.

Ons sien ook uit na samewerking hier met LAPA-uitgewers.

LWDB gebruik 09

LWDB gebruik 10

Die VivA Leerderwoordeboek word ondersteun deur die volledige VivA Woordeboekportaal. In Julie 2019 bevat dié portaal reeds meer as 50 woordeboeke en terminologielyste, onder meer die volledige Woordelys, Lys afkortings en simbole en Lys buitelandse geografiese name met afleidings van die nuutste (11de) uitgawe van die Afrikaanse woordelys en spelreëls (AWS), ’n Afrikaanse tesourus, voorsetselwoordeboek en ’n verskeidenheid vakwoordeboeke en -lyste.

Die meeste van hierdie bronne is volledig gratis tot jou beskikking – ook in die VivA Woordeboek-app op jou slimfoon en Windows 10-rekenaar. (Klik op die skakels regs van die leerderwoordeboek, of daar onder op jou slimfoon, om die een af te laai wat reg is vir jou. Ook ons slimtoepassing is pasella, mahala, verniet.) 

Naas al die gratis inhoud stel enkele uitgewers – vir gebruikers wat daarop wil inteken – nóg 10 woordeboeke beskikbaar. Ingetekende gebruikers wat per jaar daarvoor betaal, het gevolglik in VivA se Woordeboekportaal ook direk toegang tot die 14 voltooide boekdele (in Julie 2019 A tot by skooi) van die omvattende Woordeboek van die Afrikaanse Taal (die WAT), die 2015-uitgawe van die Handwoordeboek van die Afrikaanse Taal (HAT6), Tom McLachlan seHAT Afrikaanse Taalgids, drie skoolwoordeboeke (Afrikaans, Engels en Engels-Afrikaans) en die Longman Dictionary of Contemporary English(LDOCE) van die uitgewer Pearson. 

Ek verwelkom en waardeer enige kommentaar oor VivA se woordeboekportale. Stuur gerus Hierdie e-posadres word van Spambotte beskerm. Jy moet JavaScript ontsper om dit te lees., gemerk vir my aandag.

Lees 496 tye Laaste modifikasie op Maandag 15 Julie 2019 07:49

RSS-VOERE

Is jy 'n groentjie as dit oor RSS-voere gaan? Laai ons blitsgids af om jou te help.

NUUSARGIEF

FACEBOOK