Daar is soveel interessante woorde in verskeie moedertale. Het jy al ooit gehoor van “adem-i merkeziyet" met die betekenis ‘desentralisasie’ in Turks, “waldeinsamkeit” met die betekenis ‘om alleen in die woud te wees, in vrede met die natuur’ in Duits, en “mamihlapinatapai” wat beteken ‘’n kyk tussen twee mense wat iets wil inisieer, maar huiwerig is’ in Yahgan, ’n uitgestorwe taal wat  in die Falklandeilande gepraat is (Oxenham 2022).

VivA het in 2023 ’n Bedryfsingenieurswese-student van Stellenbosch Universiteit, Duval Meyer, die geleentheid gebied om ’n internskap by VivA te voltooi as deel van sy finalejaarskripsie. Onder leiding van prof. André van der Merwe, verbonde aan die Bedryfsingenieurswese-departement se tak vir digitale slimstelsels, het Duval ’n onderskeiding behaal vir sy projek wat gefokus het op die uitbreiding van taaltegnologie vir alledaagse gebruik.