VivA stel bekend: Ons taal-en-tegnologietoer vir September 2023

NOG ’N SPORTTOER? ’N FIETSTOER? ’N KOORTOER? NEE, ’N TAALTOER!

Is jou leerder ’n presteerder? Is woorde vir julle ’n wonder en weet julle dat taal ’n goue skakel met die res van die wêreld is? Weet julle dat tegnologie en taal onafskeidbaar is as dit kom by die voortbestaan van enige taal, veral in die digitale era waarin ons leef?

Dan is die taal-en-tegnologietoer wat die Virtuele Instituut vir Afrikaans tans vir hoërskoolleerders reël, iets wat julle nie moet misloop nie.

WAARHEEN GAAN ONS?

VivA beoog om vanaf 27 September tot 9 Oktober 2023 ’n toer na die volgende plekke te onderneem:

• Parys, Frankryk
• Brugge, België
• Brussel, België
• Gent, België
• Antwerpen, België
• Amsterdam, Nederland
• Leiden, Nederland
• Volendam, Nederland
• Neeltje Jans, Nederland
• Haarlem, Nederland
• Den Haag, Nederland

FOKUS HIERDIE TOER NÉT OP TAAL?

Nee! Hierdie toer fokus nie nét op die voordele en werksgeleenthede in taalkunde nie, maar ook in:

• Sagtewareontwikkeling
• Sosialemedia-inhoudskepping
• Digitale inhoudskepping
• Ingenieurswese
• Grafiese ontwerp
• Webbladontwikkeling
• Taaltegnologie

VivA bied leerders ook die geleentheid om meer te leer oor die digitale era waarin ons leef. Dit sluit in: konsepte soos soekenjinoptimalisering (SEO), hoe data-algoritmes werk, en die tegnologie wat groot organisasies soos Facebook, Instagram, Twitter en Google gebruik om ’n groeiende digitale markaandeel in die wêreld te bekom. Daarom besoek ons:

• Die Instituut voor de Nederlandse Taal (INT) aan die Universiteit Leiden, ’n instituut wat tegnologie inspan en sagteware ontwikkel om ’n digitale platform daar te stel waar alle inhoud oor Nederlands, Vlaams en ander Nederlands-verwante dialekte ’n digitale tuiste het;
• Prof Jacques van Keymeulen, taalkundenavorser verbonde aan die Universiteit Gent, België;
• Prof Yves T’Sjoen, verbonde aan die Gentse Sentrum vir Afrikaans en die Studie van Suid-Afrika, en organiseerder van die jaarlikse Gent Kollokwium waartydens die nuutste navorsing oor Afrikaans bespreek word;
• Die Poësiesentrum in Gent wat dien as ’n dokumentasie-, inligting- en studiesentrum vir Nederlandstalige poësie en buitelandse poësie wat Afrikaans insluit;
• Die Universiteit Leiden en die Universiteit van Amsterdam waar Afrikaans as ’n universiteitsvak aangebied word en professors toergangers sal toespreek;
• Die Zuid-Afrikahuis in Amsterdam, ’n kultuur- en inligtingsentrum vir Afrikaans met ’n biblioteek wat meer as 60 000 Afrikaanse boeke en tydskrifte beskikbaar het. Die Zuid-Afrikahuis bied ook Afrikaanslesse vir Nederlanders aan onder leiding van Elize Zorgman, ’n oud-Suid-Afrikaner wat meer as twintig jaar gelede emigreer het na Nederland; en
• Die Nederlandse Taalunie in Den Haag, onder leiding van Ingrid Glorie, verbonde aan die Internationale Vereniging voor Neerlandistiek (IVN) en organiseerder van die Festival voor het Afrikaans, wat weer in 2023 aangebied sal word.

Maar ons maak darem tyd vir ander opwindende toeristeaktiwiteite ook, daarom is die volgende by die toerplan ingesluit:

• ’n Dag in Parys saam met Marita van der Vyver
• Die Eiffeltoring
• Arc de Triomphe
• Montmarte en Sacré Coeur
• Disneyland Paris
• Muiderslot-kasteel
• Zaanse Schans
• Keukenhof
• Deltapark Neeltje Jans
• Die Atomium, Brussel
• Die Platin-Moretus-museum in Antwerpen
• ’n Staptoer in Antwerpen saam met ’n plaaslike gids
• ’n Kanaalbootrit in Amsterdam/Brugge
• Sjokolademuseum in Brugge
• Mauritshuis
• Delvillebos

WAT GAAN ONS BELEEF?

Die fokus is op die taal se herkoms, natuurlik, maar ook op die rol wat Afrikaans vandag nog in hierdie deel van die wêreld speel. Ons lê klem op die belangrike plek wat Afrikaans in die Germaanse taalfamilie beklee, en ons stel ons jong reisigers voor aan die Europese akademici en instellings wat vandag nog Afrikaans in hulle navorsing en tegnologie-ontwikkeling insluit.

WIE KAN DIE TOER MEEMAAK?

Hoërskoolleerders wat meer wil leer oor Afrikaans en interessante beroepskeuses, is welkom om hierdie interessanthede saam met ons te besoek. ’n Minimum van tien leerders uit elke skool kan saam met hul onderwyser op hierdie toer gaan. Die onderwyser sal as toerouer vir hierdie leerders optree saam met die VivA-span. Kostes beloop R46 950 vir September 2023.

WIE REËL EN BESTUUR DIE TOER?

VivA se uitvoerende direkteur, Marlie Coetzee, en Elza Gerber van Tienie Jonker Toere tree as toeroperateurs op. Hulle sal voortdurend saam met die groep wees om toe te sien dat dinge klopdisselboom verloop. Die toer word deur ’n professionele toeragentskap, Tienie Jonker Toere, beplan, gereël en bestuur. Tienie Jonker Toere het reeds meer as sewe-en-twintig jaar ervaring as dit kom by internasionale toere en gesels gereeld Saterdagmiddae met Johan Rademan op RSG.

WIE GAAN OOK NOG DIE TOER MEEMAAK?

Prof Gerhard van Huyssteen, bekende taalkundenavorser en taalfoendie van die Op die spel-reeks wat vir drie seisoene op kykNET aangebied is, sal ook by die toergroep aansluit. Hy is verantwoordelik daarvoor om vir die toergangers meer te leer oor die geskiedenis van Afrikaans, die verskille en ooreenkomste tussen Afrikaans, Nederlands en Vlaams uit te wys en ook te verduidelik watter kardinale rol tegnologie in die voortbestaan van Afrikaans (en eintlik enige taal) in die wêreld speel.

WAAR KAN EK MEER INLIGTING KRY?

Inligting oor die presiese reisplan, die prys, die datums en die voorwaardes vir deelname is op ons webblad beskikbaar.

Skakel met ons uitvoerende direkteur, Marlie Coetzee, by Hierdie e-posadres word van Spambotte beskerm. Jy moet JavaScript ontsper om dit te lees. vir meer besonderhede.

Besprekings word hanteer deur Tienie Jonker Toere: https://tjtoere.co.za/inskrywingsvorm

Volg ons op ons sosialemediaplatforms om meer te sien van wat jy te wagte kan wees met hierdie taaltoer:

• Facebook
• Instagram
• TikTok
• Twitter: @viva_afrikaans
• YouTube

Sluit ook gerus by VivA se taaltoergroep op Facebook aan en gesels lekker saam met ons oor die toere.

WORD DAAR NOG TOERE BEPLAN VIR 2024?

Die voorlopige beplanning vir 2024 lyk as volg:

• April-toer: 19 tot 31 Maart 2024
• Junie-toer: 13 tot 25 Junie 2024
• September-toer: 18 tot 30 September 2024

Prys: Ongeveer R47 950 per persoon vir 2024

Dag 4

Vandag gaan ons net pret hê. Net ná ontbyt gaan ons Disneyland toe waar ons heeldag gaan baljaar.

Dag 5

Ons vertrek vroegoggend noordwaarts en reis deur die Franse platteland voor ons die grens oorsteek na België waar ons vir die volgende twee aande in Gent, die universiteitstad, tuisgaan. Vandag besoek ons die Poësiesentrum, tuiste van ’n groot versameling Afrikaanse poësie. Daarna kry ons kans om Gent se winkels op horings te neem.

Dag 6

’n Besoek aan die Universiteit Gent, asook die Gentse Sentrum vir Afrikaans en die Studie van Suid-Afrika is op vanoggend se program. Die middag verken ons die prentjiemooie Brugge. Ons besoek onder andere die sjokolademuseum en proe die heerlikste Belgiese sjokolade. ’n Kanaalvaart is ’n gewilde opsie en wanneer die honger knaag, kan ons aan krokette smul.