Word ’n VivA-weldoener

VivA is tans besig om ’n tegnologiese taalwêreld te skep, en ons wil graag hê dat jy deel moet wees van hierdie innoverende projek. Hier by VivA werk ons elke dag in, vir, en aan Afrikaans. En as jy ʼn VivA-weldoener word, gee jy vir ons net daardie ekstra hupstoot om harder te werk en meer gedoen te kry. Die tegnologiese taalwêreld wat VivA besig is om te ontwikkel, is vir ons ʼn besonderse prestasie en ’n mylpaal vir Afrikaans. Ons bied VivA-weldoeners nou ook die geleentheid om meer betrokke te raak by hierdie tegnologiese taalfamilie wat ons ontwikkel. Dit is ’n voorreg om elke dag aan iets te kan werk wat sal bly voortbestaan – lank nadat ons nie meer hier is nie. Ons weet dat ons gebruikers dieselfde sentiment as ons oor Afrikaans deel – jul harte is altyd bereid om te help bou aan die groter prentjie. Meer as 73% van VivA se weldoenbydraes gaan vir finansiering van die skep van ons inhoud deur professionele navorsers, onderwyskundiges, taalpraktisyns en sagtewareontwikkelaars. VivA kry baie terugvoer van ons gebruikers af wat ons aanmoedig om aan te hou met die skep van korrekte en geverifieerde inhoud, en ons poog om hierdie inhoud innoverend deur tegnologie by ons gebruikers uit te kry. Ons kan dit aanhou regkry deur jou finansiële bydrae. Die ander 27% van ons uitgawes word aangewend om ons maandelikse bedryfsuitgawes te dek.

Wanneer jy ʼn VivA-weldoener word, ontvang jy die volgende voordele:

• ʼn R50-, R100- of R200-geskenkbewys vir VivA-Uitgewers;
• 10%-afslag op VivA+-lidmaatskap (ter waarde van R870);
• Gratis bywoning van twee Teksredaksieportaalwerkwinkels van jou keuse (ter waarde van R900);
• Jou naam en ʼn kort profielstorie oor jou word op VivA se weldoeners-ererol geplaas;
• Die bedrag van jou bydrae is vrywillig – jy besluit hoeveel en hoe gereeld (maandeliks of jaarliks);
• Jy kan enige tyd kanselleer* (tensy jy ʼn VivA+-lidmaatskap of kommersiëlewoordeboeklisensie wat vir 12 maande geldig is, aangekoop het);
• Jy stel iemand anders in staat om VivA se inhoud gratis te kan raadpleeg.

Bykomende voordele vir jou as ʼn VivA-weldoener:

• Geleentheid om die VivA-personeel te ontmoet en met ons te gesels oor jou drome vir Afrikaans;
• Maandelikse agter-die-skerms-nuusbriewe vir ons weldoeners; en
• Uitnodigings na VivA-geleenthede en -bekendstellings van nuwe sagteware en professionele ontwikkelingswerkwinkels.

VivA-weldoeners dra by tot die bevordering van Afrikaans op alle terreine deur die ontwikkeling van nuwe en innoverende tegnologie vir Afrikaans se taalwêreld te ondersteun. Dit gaan hier nie bloot net oor finansiële steun nie, maar oor saamdink en saampraat oor die toekoms van Afrikaans, die deel van idees en die gebruik van tegnologieë wat vir en in Afrikaans geskep word. VivA-weldoeners het die geleentheid om vandag al meer betrokke te raak by die ontwikkeling van Afrikaans se toekoms en bied die nodige steun om Afrikaans meer toeganklik te maak vir minderbevoorregte gemeenskappe asook internasionale gebruikers. Deur as VivA-weldoener te registreer, raak jy deel van die tegnologiese taalfamilie en bou jy saam aan ʼn Afrikaanse toekoms vir komende generasies. Dit is meer as net ʼn goeie belegging in jou taalkennis – dit is ook vir ʼn goeie doel. Word deel van die toekoms van Afrikaans … vandag al!

Laat ’n liefdadigheidserfenis na

Opsie 1

Laat ’n liefdadigheidserfenis na

Omdat VivA ’n geregistreerde PBO is, kan VivA-gebruikers in ’n testament geld aan VivA bemaak sonder om boedelbelasting op daardie bemaking te betaal (die oorledene se erfgename sal dus ’n belastingkorting ontvang vir alle bemakings aan VivA).

Voorbeelde van klousules in ’n testament

Die Testateur/Testatrise bemaak hiermee ’n kontantlegaat gelyk aan ______________ aan die Virtuele Instituut vir Afrikaans NPC (Registrasienommer: 2015/031544/08) PBO-nommer: 930062366

Die Testateur/Testatrise bemaak hiermee die restant van sy/haar boedel aan die Virtuele Instituut vir Afrikaans NPC (Registrasienommer: 2015/031544/08) PBO-nommer: 930062366

Opsie 2

Benoem VivA as begunstigde van ’n lewenspolis

’n VivA-gebruiker kan oorweeg om die opbrengs van ’n lewensversekeringspolis aan VivA na te laat. Die individu betaal die premie elke maand aan VivA, wat op hulle beurt die premie op die polis betaal. Die individu kan dan die maandelikse bydraes as ’n donasie aan VivA van belasting aftrek en so ’n belastingkorting kry. Wanneer die versekerde lewe te sterwe kom, eis VivA en ontvang die voordeel. Omdat VivA die begunstigde van die polis is, sal die polisbedrag wat uitbetaal word nie deel vorm van die oorledene se boedel nie.