In hierdie uitdeelstuk word die verskillende betekenisse van hulpwerkwoorde van modaliteit (oftewel hulpwerkwoorde van wyse) uiteengesit. In die skoolkurrikulum word "sal" as ’n hulpwerkwoord van tyd geag, maar nie in VivA se Afrikaansgrammatika nie. Dit word as ’n hulpwerkwoord van modaliteit (wyse) geag, want ons gaan van die standpunt uit dat hierdie werkwoord binne die konteks van toekomsverwysing eerder op ’n waarskynlikheid dui, net soos "kan", "mag" en "moet", om enkele voorbeelde te noem. Ons erken eintlik slegs een hulpwerkwoord van tyd, naamlik “het”. Die doelwit van die uitdeelstuk is om leerders in staat te stel om nie net hulpwerkwoorde te kan identifiseer nie, maar ook te bepaal wáárom die skrywer/spreker ’n bepaalde een kies. Die aanbeveling is dat die Afrikaansonderwyser die inhoud steier, sodat enkele betekenisse in die Intermediêre Fase behandel word en progressie in hoër grade plaasvind.